БҰҰ әртүрлі құрылымында Қазақстанның 20 азаматы жұмыс істейді

13 Наурыз, 2017 12:56

Болашақта Қазақстан өкілдерін БҰҰ құрылымдары мен жетекші органдарына, өзге де халықаралық ұйымдарға ілгерілету қажет. Бұл туралы Парламент Мәжілісінің депутаты Мәулен Әшімбаев «Қазақстан Республикасының БҰҰ Қауiпсiздiк кеңесiне 2017-2018 жж. мүшелiгiнiң басымдықтары» деген тақырыпта өтіп жатқан Мәжiлiстегi Үкiмет сағатында айтты.

«Қазақстанның БҰҰ Қауіпсіздік кеңесіндегі мүшелігін қазақстандық дипломатияны жетілдіруде мақсатты қолдану қажет. Сыртқы істер министрлігінің қызметкерлері құнды тәжірибе жинауда. Бұл екі жылды жас дипломаттарды тәжірибе жинау мен дипломатиялық шеберлікті меңгерту үшін қолданған жөн», - деді М.Әшімбаев.

Ол айтып өткендей, халықаралық ұйымдарда қазақстандық өкілдердің санын арттыру өте маңызды.

«СІМ хабарлағандай, қазіргі таңда БҰҰ жүйесінде Қазақстанның 20 азаматы жұмыс істейді. Бұл тек біздің өкілдікте жұмыс істейтіндер ғана емес, БҰҰ әртүрлі құрылымында еңбек ететіндер. Болашақта Қазақстан өкілдерін БҰҰ құрылымдары мен жетекші органдарына, өзге де халықаралық ұйымдарға ілгерілету қажет.Жалпы, осындай саясатпен әлемнің көптеген елі айналысады. Біз де бұл бағытқа аса назар аударуымыз керек», - деді М.Әшімбаев.

Қайрат Жандыбаев

Барлық жаңалықтар