Қазақстан мен Франция қорғаныс ведомстволары 2014 жылдың ынтымақтастық жоспарына қол қойды

18 Желтоқсан, 2013 12:15

ҚР Қорғаныс министрлігінде Қазақстан қорғаныс ведомствосының әскери қызметшілері француздық әріптестерімен екіжақты келіссөздер өткізді. Екіжақты келіссөздер барысында тараптар қазақ-француз әскери ынтымақтастығын дамытудың болашағын талқылады, деп Қорғаныс министрлігінің баспасөз қызметі хабарлады.

«Қазақстан мен Франция арасындағы қоғаныс саласындағы өзара іс-қимыл екіжақты қарым-қатынастың басым бағыы болып табылады», - делінген хабарламада.

ҚР Қорғаныс министрлігі Халықаралық ынтымақтастық департаментінің бастығы полковник Әділ Беков шетелдік әріптестерімен кездесу барысында:

«Біз қазақ-француз әскери ынтымақтастығын одан әрі нығайтуға мүдделіміз. Француз тарапына «Ле-Бурже» халықаралық авиациялық өнімдер және ғарыш көрмесіне қатысуға қазақстандық делегацияның сапарын ұйымдастырғаны үшін ризашылығымды білдіргім келеді. Аталған іс-шара бізге авиациялық техника мен қару-жарақтың жаңа үлгілерімен танысуға мүмкіндік берді», - деп атап өтті.

Өз кезегінде француздық тарап «KADEX-2014» қару-жарақ және әскери-техникалық мүлік көрмесіне Францияның қорғаныс компанияларын қатысуға шақырған ұсынысы үшін қазақстандық әріптестеріне ризашылықтарын білдірді.

Кездесу соңында екі ел қорғаныс ведомстволарының өкілдері ағымдағы жылдың қорытындысын шығарып, 2014 жылдың ынтымақтастық жоспарына қол қойды.