ҚР Мәжілісі электрондық астық қолхаттары жүйесін жетілдіруге енген түзетулерді мақұлдады
18 Желтоқсан, 2013 11:52
Бүгін, 18 желтоқсан Мәжілісте Палата Спикері Нұрлан Нығматулиннің төрағалығымен өткен жалпы отырыста астық нарығын реттеу мәселелері бойынша заңнамалық түзетулер бірінші оқылымда мақұлданды, деп палатаның баспасөз қызметі хабарлады.
«Ұсынылып отырған жаңа енгізілімдер электрондық астық қолхаттары жүйесін және астық қабылдау кәсіпорнын немесе мақта өңдеу ұйымдарын уақытша басқаруды жетілдіруге бағытталған», - делінген хабарламада.
Үкіметке астық қолхаттарының мемлекеттік электрондық тізілімінің операторын айқындау өкілеттігі бекітіліп берілді, оператор аталған тізілімді жүргізуді (оның жұмыс істеуін және сүйемелденуін) жүзеге асырады.
Сондай-ақ, астық қабылдау кәсiпорнының техникалық сыйымдылығы көлемі шегінде астық қолхаттарын және оның бөліктерін беруді жүзеге асыру ұсынылды.
Түзетулерді Палата қарауына енгізген Мәжілістің Аграрлық мәселелер комитетінің атынан жалпы отырыста депутат Анатолий Маковский сөз сөйледі.
