Қазақстан және Мысыр дін саласында өзара ынтымақтастық туралы келісті

Қазақстан Республикасының Дін істері және азаматтық қоғам вице-министрі Берік Арын 2017 жылғы 8-9 наурыз аралығында Каир қаласында (Мысыр) өткен Қазақстан-Мысыр сауда-экономикалық, мәдени-гуманитарлық, ғылыми және техникалық ынтымақтастық жөніндегі Үкіметаралық комиссиясының (ҮАК) 5-ші отырысына қатысты.

Іс-шара Қазақстан мен Мысыр арасындағы дипломатиялық қарым-қатынастардың 25-жылдығы шеңберінде өтті. Қазақстандық делегацияны ҚР Мәдениет және спорт министрі Арыстанбек Мұхамедиұлы, ал мысыр тарапын – МАР Инвестициялар және халықаралық ынтымақтастық министрі  Сахар Наср ханым басқарды.

Келіссөздер барысында екіжақты ынтымақтастықтың мәселелері, соның ішінде дін саласындағы сұрақтар жан-жақты  қарастырылды.

Комиссия отырысының қорытындысы бойынша хаттамаға және бірнеше құжаттарға, солардың қатарында дін саласындағы өзара ынтымақтастықтың негізгі бағыттарын қамтитын – ҚР Дін істері және азаматтық қоғам министрлігі мен МАР Уақыфтар істері жөніндегі министрлігі арасындағы өзара түсіністік туралы меморандумға қол қойылды.

ҮАК хаттамасында да Алматы қаласындағы Мысыр ислам мәдениеті орталығының «Нұр-Мүбәрәк» университетінде исламтану саласындағы ұлттық кадрларды дайындау бойынша мәселесі де көтерілді.