Маңғыстауда өңдеу өнеркәсібінде 10 мың жұмыс орны ашылады

10 Наурыз, 2017 20:43

Маңғыстау облысының әкімі Алик Айдарбаевтың төрағалығымен өткен кеңес жұмысына мемлекеттік органдардың, банк бөлімдерінің, «Даму» қорының, Маңғыстау облысындағы кәсіпкерлер палатасының, мемлекеттік-жеке меншік әріптестік орталығының өкілдері мен кәсіпкерлер қатысты, деп хабарлады облыс әкімдігінің баспасөз қызметі.

Аймақтағы өңдеу өнеркәсібінің ағымдағы жағдайы, даму жолдары және проблемалары туралы Маңғыстау облысының индустриялық-инновациялық даму басқармасының басшысы Нұрбек Қарасаев баяндады.

Маңғыстау экономикалық кеңесінің мүшелерімен қаралған жобалардың көбісі өңдеу өнеркәсібіне қатысты. Аталған жобалардың іске қосылуы өңдеу саласында 10 мыңнан астам жұмыс орынының ашылуын қамтамасыз етуі мүмкін. Бұл қаралған 525 жоба бойынша барлық жұмыс орындарының 48%-ын құрайды. Инвестиция көлемінің 29%-ы, яғни 500 млрд.теңгеден астамы өңдеу саласындағы мәлімделген жобаларды жүзеге асыруға жұмсалған.

- Осы алаңда таныстырылған жобалардың әрқайсысына жауапты орындаушы, нақты лауазымды тұлға тағайындалып, ол өзінің құзыреттілігі шеңберінде әкімшілік көмек көрсетіп, жобаның орындалысы жөнінде есеп беретін болады. Сондай-ақ, отырысқа қатысушылардан түскен ұсыныстар мен пікірлерді әр бағыт бойынша менің орынбасарларым басшылық ететін жұмыс топтарына беруге немесе кеңес үйлестірушісі – Маңғыстау облысы мемлекеттік-жеке меншік әріптестігі өңірлік орталығы арқылы беруге болады, - деп атап өтті Маңғыстау облысының әкімі Алик Айдарбаев.

Маңғыстау экономикалық кеңесінің келесі отырысы көлік-логистикалық кешенді, құрылыс, туризм салаларын және басқа да бағыттарды дамытуға арналатын болады.

Барлық жаңалықтар