Қарағандылық оқушылар жаңартылған бағдарлама бойынша оқулықпен қамтамасыз етіледі

10 Наурыз, 2017 10:56

Қарағанды облысының білім басқармасындағылар өңірдегі шағын комплектілі мектептердің жағдайы туралы баяндады. Жаңа оқу жылы қарсаңында екінші, бесінші және жетінші сынып оқушыларына арналған кітаптар жиынтығы толық сатып алынады, деп хабарлады облыс әкімдігінің баспасөз қызметі.

Биылдан бастап олар жаңартылған бағдарламалар бойынша білім алуға көшеді. Еске салайық, өткен жылы барлық бірінші сынып оқушылары жаңартылған бағдарлама бойынша кітаптармен қамтамасыз етілген болатын.

Оқулықтарды сатып алуға 2,4 миллиард теңге қажет. Бірақ білім бөлімдерінде 1,6 миллиард қана бар.

«Жетіспей тұрған қаржы бюджет нақтыланған соң бөлінеді.Бұл мәселе сәуір айының ортасына дейін шешілуі керек, өйткені әлі өтінім беру керек, типография қажетті оқулықтар санын басып шығаруға тиіс, содан кейін оларды жеткізіп, мектептерге тарату қажет», - деді білім басқармасындағылар.

Қазіргі кезде тоғызыншы сыныптарға арналған оқулықтармен қиындықтар бар. Олар биыл қайта басылып шығарылуға тиіс болатын. Себебі олардың жартысы жоғалса, қалған бөлігі ескірген. Ал 2019 жылға қарай тоғызыншы сынып оқушылары жаңа бағдарлама бойынша оқитын болады, олар үшін жаңа кітаптар шығарылады, биыл оқушылардың осы санаты үшін оқулықтар сатып алынбайды, деп атап өтті басқармадағылар.

Кітаптар жетіспеушілігі мәселесі әзірге қайта үлестіру арқылы шешіліп келеді. Мектептер әр сыныптағы оқушылар саны бойынша есеп береді, егер артық кітап қалса, олар жетпей қалған мектептерге беріледі.

Барлық жаңалықтар