• Басты
  • ҚР БҒМ толықтай электрондық форматқа көшу туралы шешім қабылдады

ҚР БҒМ толықтай электрондық форматқа көшу туралы шешім қабылдады

9 Наурыз, 2017 13:21
Біз электрондық форматқа көшу туралы шешім қабылдадық. Бұл туралы білім және ғылым министрі Ерлан Сағадиев ҚР Үкіметінде болған баспасөз конференциясында хабарлады.

«Біз ілгері қарай жылжуымыз керек. Министрлікке қағаз жүзіндегі есептілік қажет емес.  Біз электрондық форматқа көшуді шештік. ҰБДҚ мен электрондық журнал арасында министрлікке қажетті барлық деректерді орналастыру керек. Сондықтан біз Қаржымині мен прокуратура өздерінің тексерушілеріне электрондық есептіліктің қағаз жүзіндегі есептілікке тең екені туралы түсініктемелер шығаруы үшін олармен жұмыс жасап жатырмыз. Ұлттық білім беру дерекқоры мен «Күнделік» арасындағы қағаз жүзіндегі есептілікті алып тастай аламыз», – деді Е. Сағадиев.

Министрдің айтуы бойынша, оны қажет етпейтін мектептер болса, олардың электрондық журналды енгізбеуге толық құқығы бар.

«Күнделік» пилоттық режимде енгізіліп жатыр, тізімді облыстық білім басқармалары ұсынады. Ал олар әкімдіктерге бағынады. Сонымен бірге, егер қандай да бір фирма келіп, басқа немесе сол мектептерді таңдаса және пилоттық режимде енгізуге ниет білдірсе, мектептер қарсы болмаған жағдайда оған тыйым салынбайды. Толық құжаттар жобасымен бір ғана компания өтінім берді – ол «Күнделік» компаниясы. Алайда, екінші компания қатысуға жазбаша түрде өтінім бергенімен, оның тұжырымдамасы, қаржы-экономикалық негіздемесі, ТЭН болмаған. Біз барлық рәсімдерді тексердік. Дегенмен, «Атамекен» және IT Қауымдастығы бізге әзірлеушілермен кездесу туралы өтініш білдірген еді. Ең бастысы, Қазақстанда ілгерілеу болуы, мұғалімдер қағазбастылықтан құтылуы тиіс, біз қандай да бір компанияны жылжытуға мүдделі емеспіз. Жалғыз талап – оның тегін болуы», – деді Е. Сағадиев.

Сондай-ақ, ол бүгінде интернет желісі мектептердің барлығында бірдей қамтамасыз етілмегенін атап өтті.

«Егер біз «Күнделік» мәселесін шешсек, бізде интернет желісін қосу проблемасы ғана қалады. Компьютерлер сатып аламыз, бір сыныптан басқа сыныпқа жүгірмеу үшін әкімдерге әрбір сыныпқа Wi-Fi орнату туралы өтініш жасаймыз. Бұл мәселені қалай да шешу керек. Оған қоса, бізде Дүниежүзілік банкпен жоба бар, онда нашар мектептерді, әсіресе ауылдарда орналасқан және шағын жинақталған мектептерді материалдық және техникалық жарақтандыруды жоспарлап отырмыз», – деп мәлімдеді Е. Сағадиев.

Қайрат Жандыбаев

Барлық жаңалықтар