Астанада көп балалы аналарға құрмет көрсетілді (ФОТО)

12 баланың анасы, «Алтын алқа» құрмет белгісінің иегері Күлшара Өтегенова отбасындағы ананың рөлі туралы айтып берді.

«Мен 12 баланың анасымын, барлығын Қызылордада ешкімнен кем қылмай, бірлікте өсіріп шығардым. Бүгінгі таңда 30 немерем және 15 шөберем бар. Балаларымның барлығы астанада халық игілігіне жұмыс істеп жүр. Бүгінде өркендеп жатқан Қазақстанда тұрып, жұмыс істеп жатқан балаларым үшін өте қуаныштымын», - деді К. Өтегенова.

Күлшара апа айтып өткендей, бүгінде елімізде даму үшін барлық мүмкіндіктер жасалған. Бастысы, еңбек етіп, бір-бірін сыйлай білу.   

«Бейбіт өмір сүріп жатқанымыз үшін Президентімізге алғыс білдіремін. Еліміз күн сайын гүлденіп, өміріміз жылдан жылға жақсарып келеді. Осының барлығы Елбасымыздың лайықты саясатының арқасында. Барлық аналарды, әжелерді келе жатқан мейраммен құттықтаймын!», - деп бөлісті құрметті ана.

Айта кету керек, мерекелік кездесу неке және отбасы құндылықтарын, жоғары адамгершілік қасиеттерін таратуға, әйелдерді қоғамда экономикалық және саяси ілгерілетуге бағытталған.

Ақбота Күзекбай

Автордың суреті