Көне Уффици галереясы ЭКСПО-2017 қонақтарына көрмесін ұсынуға дайын
Галерея өкілдері экспозияциясын ЭКСПО-2017 көрмесіндегі қазақстандық және шетелдік туристердің ерекшеліктерін есепке ала отырып өзгерту мен кеңейтуге ниет білдіруде.
Осыған орай, ҚР Мәдениет және спорт вице-министрі Ақтоты Райымқұлова және Италияның Қазақстандағы Төтенше және Өкілетті Елшісі Стефано Раваньян Астанадағы ЭКСПО-2017 халықаралық мамандандырылған көрмесі аясында барша әлемге танымал Уффици галереясымен бірге мәдени жоба ұйымдастыру мәселесін талқылады.
Ақтоты Райымқұлова өз сөзінде ЭКСПО-2017 көрмесі аясында әлемнің ең танымал музейлерінің бірі болып табылатын Уффицидің көрмесін ұйымдастыру халықаралық мамандандырылған көрменің мәдени бағдарламасын безендіре түсетіндігіне сенімін білдірді.
«Классикалық мәдениет пен Жаңғыру кезеңінің, сондай-ақ әлемдік мәдениет тарихындағы көптеген көрнекті өкілдердің отаны болып табылатын Италиядан қонақты қарсы алу біз үшін үлкен абырой. Музей саласындағы көшбасшылардың бірі – Уффици галереясының түрлі ұсыныстарымен танысып, оларды талқылауға Қазақстанның дайын екенін білдіремін», - деді А.Райымқұлова.
Стефано Раваньян қазақстандық әріптестеріне қонақжайлығы мен Қазақстан мен Италияның екіжақты мәдени ынтымақтастығын нығайту мен кеңейтуге бағытталған ұдайы ұмтылысы үшін алғысын білдірді.
«Астанада ең жас, алайда бүгінгі таңның өзінде-ақ ең табысты музейлердің бірі орналасқан. Болашақта ол әлемге танымал өнер орталығына айналатынына сенімдімін. Қазақстанның Ұлттық музейінің Уффици галереясы секілді музей ісі «ақсақалдарымен» тығыз байланысы бізге екі жақты пайда алып келеді деген сенімдемін. Өз жағымыздан сізге бұл істе кез келген қолдау көрсетуге дайын екендігімізді сендіремін», - деді Елші.
Уффици галереясының директоры Айке Шмидт музей ісі саласындағы қазақстан-италияндық ынтымақтастықты нығайту туралы өз ұсыныстарымен бөлісті. Көне итальяндық музейдің жетекшісі айтып кеткендей, екі мемлекеттің кәсіби саладағы өзара байланысы екі мәдени бағытқа негізделуі мүмкін. Олардың қатарында – көрмелер ұйымдастыру және ақпарат, білім алмасу мен мамандардың кәсіби біліктілігін арттыру бар.
