БҚО-да Тәуелсіздік күніне орай жаңа мектеп ашылды

17 Желтоқсан, 2013 10:30

Тәуелсіздік күніне орай Ақжайық ауданының Сайқұдық ауылында жаңа мектеп ашылды, деп облыстық әкімдіктің баспасөз қызметі хабарлады.

«Жаңа мектепке танымал ақын Жұбан Молдағалиевтің есімі берілді. Оқу орны алаңына жазушыға арнап ескерткіш орнатылды», - делінген хабарламада.

«БҚО-да бір жыл ішінде үш кезеңдік білім алу мәселесі шешімін тапты. Бүгінгі күні апатты жағдайдағы 6 мектеп бар, оның төртеуі жөндеуге жатпайды, қалған екеуіне күрделі жөндеу жұмыстары қажет. Бүгін Сайқұдық ауылында 198 орындық жаңа мектепті пайдалануға бердік. Бұл ауылдағы мектеп апатты жағдайда болған еді. Қазіргі жаңа мектеп толыққанды білім беруге қажетті құрал-жабдықтармен жабдықталған», - деп мәлім етті БҚО әкімі Нұрлан Ноғаев.

198 орындық мектеп облыста мұнайгаз кен орнын өндіруші «Қарашығанақ Петролиум Оперейтинг Б.В.» ірі компаниясының қаржыландыруымен салынды. Құрылыстың мердігері – «Болашақ» ЖШС.

Жаңа мектепте 15 кабинет, 20 орындық оқу залы, 3 шеберхана мен спортзал, 66 орындық акті залы, медкабинет және 66 орындық асхана бар.