ЭКСПО-2017 көрмесіне Малайзияның 50-ден астам технологиялық компаниялары қатысады
Кездесу барысында Д. Сарекенов Қазақстан-Малайзия қарым-қатынасының дамуы туралы баяндады. Елші Қазақстан мен Малайзия әріптестігін дамытудың негізгі аспектілеріне тоқталып, екі елдің арасындағы байланыс әріптестіктің барлық саласында басым екендігін және тереңдете түсуге қажетті басымдықтың барын атап өтті.
"Қазіргі таңда Қазақстан Республикасында малайзиялық компаниялар мен инвесторлардың қатысуымен ұзақ мерзімдік мұнай-газ, ауылшаруашылық және құрылыс салаларында құны 1 млрд. АҚШ доллары болатын жобалар жүзеге асырылуда", - деді қазақстандық дипломат.
Д. Сарекеновтың айтуынша, «Ұлт жоспары – 100 нақты қадам» бағдарламасын жүзеге асыру аясында Малайзиямен исламдық қаржыландыру, инфроқұрылымдық жобаларды жүзеге асыру, құрылыс жобалары және басқа да басым салалар бойынша сауда-экономикалық және инвесторлық әріптестік дамып келеді.
Екі ел арасындағы сауда-экономикалық және инвестициялық әріптестікті дамыту мәселесінде 2017 жылдың мамыр айында өтетін Қазақстанмен Малайзияның Бірлескен сауда-экономикалық комитетінің (БСЭК) және Іскерлік кеңес отырыстары айтарлықтай маңызға ие.
Сонымен қатар, Елші Астана қаласында өтетін ЭКСПО-2017 халықаралық мамандандырылған көрмеге Малайзияның 50 алдыңғы қатарлы технологиялық компаниялары қатысатындығын жеткізді. Сондай-ақ, көрме барысында Ұлттық күнді ұйымдастыру аясында Малайзия Премьер-Министрінің Қазақстанға сапары қарастырылып жатқаны атап өтілді.
Екі ел арасындағы сауда әріптестікті белсендендіру мақсатында Елшілік Малайзияның ірі экспорттаушыларымен және инвестициялық компанияларымен Ляньюнган порты айлағы арқылы «Батыс Европа-Батыс Қытай» құрлықаралық дәлізі бағытында жүк тасымалын ұлғайту бойынша жұмыс істеуде.
Бұдан бөлек, Елші журналистерді 2016-2020 жылдарға арналған жекешелендіру туралы мемлекеттік бағдарламаға малайзиялық компанияларды тарту, сонымен қатар, мемлекеттік-жекеменшік әріптестік негізінде жоғары технологиялық инфроқұрылымдар мен құрылыстық жобаларды жүзеге асыру барысын таныстырды.
