Қазақстан мен Әзірбайжан депутаттары бірқатар салада ынтымақтастықты тереңдетуге мүдделі
Қазақстан тарабынан Мәжіліс Төрағасының орынбасары Владимир Божко, Халықаралық істер, қорғаныс және қауіпсіздік комитетінің төрағасы Мәулен Әшімбаев пен Мәжілістегі қазақстан-әзірбайжан достық тобының жетекшісі Омархан Өксікбаев қатысты. Меймандар жағынан Әзірбайжан Милли Меджилисінің депутаты, әзірбайжан-қазақстан парламентаралық достық тобының жетекшісі Адиль Алиев, Милли Меджилис депутаты Нагиф Гамзаев және Әзірбайжанның Қазастандағы Төтенше және Өкілетті елшісі Рашад Маммадов болды.
«Түркітілес елдерге жататын бауырлармыз, тату көршіміз»,- деп бастап әріптестерін қарсы алды Мәжілістің вице-спикері. Парламентші Қазақстан бүгінде көптеген халықаралық мәселелерді шешуде үлкен роль атқарып отырғанына тоқталды.
«Еліміздегі басты басымдық қоғамдық талқылауға шығарылып отырған Конституциялық реформалар жайында таратып айтып берді. Әзірбайжандықтарды Астанада өтетін «ЭКСПО-2017» халықаралық мамандандырылған көрмесіне шақырды. Қазақстан Халқы Ассамблеясын ұлттар арасындағы «алтын көпір»,- деп таныстырды.
Тараптар 25 жылдан бергі екі ел арасындағы дипломатиялық қатынастардың жоғары деңгейде болып келе жатқанын жеткізіп, мемлекеттердің парламентаралық ынтымақтастық байланыстары жайында ой бөлісті.
Көлік-транзит саласында Баку-Тблиси-Карс теміржол магистралінің іске қосылуын атап өтті. Депутаттар екіжақтың саяси, сауда-экономикалық, инвестиция, парламентаралық және мәдени-ізгілікті байланыстары жайында және де аймақтар мен әлемдегі жағдайлар жайында пікір алмасты.
