Астана көшелерінде тегін қолайлы қоғамдық орындар пайда болады
13 Ақпан, 2017 18:34
Астананың 10 көшесінде «Placemaking» деп аталатын қоғамдық кеңістіктер пайда болады. «Placemaking» жобасы туралы ОКҚ-да өткен баспасөз конференциясында «Қалалық шешімдер бюросы» ақпараттық-талдау орталығының директоры Дәурен Қайсаров айтты.
«Бірінші басымдық – жаяу жүргіншілерге, екінші басымдық – велосипедшілерге, үшіншісі қоғамдық көлікпен жүретіндерге беріледі. Өз автокөлігімен жүретін адамдар кейінгі орында. Барлық көлік-логистикалық жүйе дәл осы бағыт аясында дамиды. «Плейсмейкинг» – бұл қаланы қымбат бағалы көлік айырықтарын, көпірлер мен басқа да құрылыстарды салу жағына қарай дамыту емес, адамдардың тұруы, кез келген уақытта көшеге шығып, серуендеуі, достарымен кездесуі үшін қолайлы ету», - деді Дәурен Қайсаров.
Бұл жобаның негізгі мақсаты – Астана қаласының тұрғындары мен қонақтары үшін қолайлы жағдай жасау. Осы ретте, мұндай орындарда адамдардың отырып, демалуына болады. Айта кету керек, барлық 10 аймақ бір-бірімен байланысты болады.
Ақбота Күзекбай
