Греция ЭКСПО-2017 көрмесіне қатысу туралы шартқа қол қойды

Ұлттық компанияда хабарлағандай, ЭКСПО-2017 көрмесінің Комиссары Рапиль Жошыбаев Греция Республикасына жұмыс сапары аясында қоршаған орта және энергетика министрі Георгиос Статакиспен, Экономика және даму министрлігінің бас хатшысы – Грецияның ұлттық секциясының Комиссары Илиас Ксанфакоспен, сондай-ақ Грецияның «Enterprise Greece» ірі ұлттық агенттігі басқармасының төрағасы Христос Стайкоспен кездесті.

Елдің Энергетика министрлігі мен экономикалық ведомствосында Р. Жошыбаев грек басшыларымен Элладаның астана көрмесіне қатысуы мәселесін талқылады, сондай-ақ ҚР Президенті Нұрсұлтан Назарбаевтың бастамалары туралы айтып, Президенттің «Қазақстанның үшінші жаңғыруы: жаһандық бәсекеге қабілеттілік» атты Қазақстан халқына Жолдауына баса назар аударды.

Грецияның энергетика министрі көрмеде Греция халықаралық экологиялық стандарттарға сәйкес энергетика инфрақұрылымының нақты үлгілерін ұсынуға ниетті екенін мәлімдеді. Елдің жаңартылатын энергия көздерімен, әсіресе күн энергиясымен байланысты мәселелерге қатысты едәуір тәжірибесі бар. Сонымен қатар, Греция ЖЭК үлесін 2020 жылға дейін 30%-ға дейін ұлғайтуды жоспарлап отыр.

Кездесу қорытындылары бойынша Р. Жошыбаев және И. Ксанфакос Грецияның «ЭКСПО-2017» халықаралық мамандандырылған көрмесіне қатысуы туралы шартқа қол қойды.