«Белсенді азамат» жалпықалалық акциясына 2 мыңнан астам елорда тұрғыны қатысты

10 Ақпан, 2017 20:43

Елордада қала әкімдігінің бастамасымен «Белсенді азамат» кең көлемді акциясының екінші кезеңі өтті, оған 2462 адам қатысты, деп хабарлады қала әкімдігінің ресми сайты.

Ұйымдастырушылардың мәліметтеріне сәйкес, шара барысында азаматтардан түрлі салалар бойынша 2500-ден аса ауызша өтініш түскен, ал жазбаша өтініштердің саны 1702-ге жетті.

Күні бойы құзырлы құрылымдар мен ведомстволардың мамандары елордалықтарды алаңдатқан сұрақтарға жауап беріп, шағымдар мен өтініштерін қабылдады, түрлі мәселелер бойынша кеңестер берді. Шараның ұйымдастырушылары қойылған сауалдардың дені тұрғын үй, үлестік құрылыс, жұмыспен қамту және жұмысқа орналастыру мәселелеріне қатысты болғанын айтады.

Еске салсақ, халықпен кері байланыстың тиімділігін арттыруға бағытталған «Белсенді азамат» акциясының бірінші кезеңі үстіміздегі жылдың 26 қаңтарында өткізілген. Шараның екінші кезеңінің қорытындысы бойынша жүргізілген мониторингке сәйкес, халық тарапынан зор қызығушылық байқалған. Сол себепті қала билігі акцияны жүйелі негізде өткізіп тұрмақ.

Барлық жаңалықтар