Е.Канағатов: 2017 жылғы Универсиаданың сәтті өтуі – жемісті жұмыс кепілі

«Мәдениет және спорт министрлігі ұлттық олимпиада комитетінің, студенттік спорт федерациясының қолдауымен жүргізген үлкен жұмыстың арқасында біз осы Универсиадада үлкен жетістіктерге қол жеткіздік. Қазақстанда спортты дамыту саясаты жүйелі жұмыстар жүргізуді көздейді және Мемлекет басшысы спортты үнемі қолдап, өзінің Жолдауларында көпшілік спортты дамыту қажеттігін және 2020 жылға дейін барлық халықтың спортпен айналысу көрсеткішін 30%-ға дейін жеткізу міндеті тұрғанын айтады», - деді Е. Канағатов.

Сондай-ақ төраға спортшылардың еңбегі мен жетістіктерін атап өтіп, баспасөз конференциясы барысында олардың кейбіреулеріне алғыс білдірді.

«Біз спортшыларымыздың осы жарыстардағы жетістіктерін мақтан тұтамыз. 2017 жылғы Универсиада қорытындылары енді тарихқа айналды, спортшыларымыздың алдында үлкен міндеттер тұр, басты міндет 2018 жылы Кореяда өтетін Олимпиадада лайықты өнер көрсету», - деді Е. Канағатов.

Еске сала кетейік, 2017 жылғы Универсиада 29 қаңтардан 8 ақпанға дейінгі аралықта Алматы қаласында өтіп, қазақстандық спорт тарихында ең табысты болды. Студенттеріміз 36 медаль жеңіп алып, медаль есебінде екінші жалпыкомандалық орынға ие болды. Осылайша, қазақстандық спортшылар 11 алтын, 8 күміс және 17 қола медальға ие болды.

Қайрат Жандыбаев