• Басты
  • Жамбыл облысында 11 білім ордасы робототехника кабинетімен қамтамасыз етіледі

Жамбыл облысында 11 білім ордасы робототехника кабинетімен қамтамасыз етіледі

10 Ақпан, 2017 09:27
Жамбыл өңірі батыл бастамаларды қолға алды. Аймақ мектептерінде «Робототехника» үйірмелерін ашуға көңіл бөлініп жатыр, деп хабарлады Жамбыл облысы әкімдігінің баспасөз қызметі.

«Тараздағы нөмірі 54-мектеп оқушылары қолдары босай қалса, осы сыныпқа ұмтылады. Балғындар робот құрастырып, оны басқаруды үйренуде. Олар сан түрлі техника жинауға арналған арнайы құрастырмалы бөлшектермен жұмыс істейді», - делінген хабарламада.

Аймақтағы 6 оқу ошағында қазір осындай үйірмелер жұмыс істеп тұр. Қызықты да қажетті іспен алыс ауылдардағы балалар да қамтылған. Одан бөлек, Тараздағы техникалық шығармашылық орталығында 100-ге тарта жеткіншек робот жасаумен айналысуда. Балалар қолымен жасалған сондай дүниелердің бірі – арба.

Оқушылар дөңгелектің орнына темір аяқ жасап, қадамдап жүретіндей қылған. Айтуларынша, сол арқылы ауыр жүктерді оңай тасып, қырға қарай шығуда қиналмауға болады. Қазір үйірме қатысушылары электронды бағдарламалар жасау ісін мықтап меңгеруге кіріскен. Ол бағдарламалар көмегімен роботтарға күрделі тапсырмалар беріп, орындату көзделуде.

Облыста мұндай үйірмелері бар мектептер санын арттыру көзделген. Аймақ басшысының тапсырмасына сәйкес облыстық білім басқармасы жаңа оқу жылына кемінде 11 оқу ошағын қамтуы тиіс. Басты көңіл ауылдық жерлердегі білім нысандарына берілмекші.

 

Барлық жаңалықтар