МАГАТЭ және ЯСЖТШҰ басшылығына ҚР Тәуелсіздігінің 25 жылдығы медальдары табысталды (ФОТО)

Қазақстанның Австриядағы Елшілігінде – Венадағы халықаралық ұйымдар жанындағы ҚР Тұрақты Өкілдігінде Атом энергиясы жөніндегі халықаралық агенттіктің (МАГАТЭ) бас директоры Юкия Аманоны және Ядролық сынақтарға жалпыға бірдей тыйым салу туралы шарт ұйымының (ЯСЖТШҰ) атқарушы хатшысы Лассина Зербоны марапаттау рәсімі өтті, олар Қазақстан Республикасының Президенті Нұрсұлтан Назарбаевтың Жарлығына сәйкес, Қазақстан мен көрсетілген халықаралық ұйымдар арасындағы қарым-қатынастарды дамытуға қосқан үлесі үшін «Қазақстан Республикасы Тәуелсіздігінің 25 жылдығы» медальдарына лайық деп танылды.

Венадағы халықаралық ұйымдар жанындағы Қазақстанның Тұрақты өкілі Қайрат Сарыбай еліміздің ядролық қаруды таратпау саласындағы жетістіктерін, Қазақстан және МАГАТЭ мен ЯСЖТШҰ арасындағы тиімді ынтымақтастықты атап өтті. Қазақстан Президенті Н. Назарбаевтың бастамаларына ерекше назар аударылды.

Марапатталған қонақтар Қазақстан халқын Тәуелсіздіктің 25 жылдығымен құттықтап, Президент Н. Назарбаевқа олардың қызметіне берген бағасы үшін алғыстарын білдірді, сондай-ақ Қазақстанның халықаралық қауіпсіздікті нығайтуға қосқан үлесін жоғары бағалады.

«Президент Н. Назарбаевтың басшылығымен Қазақстан ядролық таратпау және қарусыздандыру процесіне маңызды үлес қосты», - деп атап өтті Ю. Амано.