Б. Сапарбаев шетелдік қатысудағы компанияның әлеуметтік жауапкершілігін көтеруге шақырды
«Мемлекет басшысы Қазақстан халқына арнаған «Қазақстанның үшінші жаңғыруы: жаһандық бәсекеге қабілеттілік» Жолдауы және жақында ғана өткен Үкіметтің кеңейтілген мәжілісінде бірқатар тапсырмалар берді. Негізгі тапсырмалардың бірі – 2017 жылдың барлық әлеуметтік-экономикалық көрсеткіштері 2016 жылғы деңгейден төмен болмауы тиіс. «Ақтөбе мыс компаниясы» — облыстағы 10 жыл шамасында еңбек етіп келе жатқан ең ірі компаниялардың бірі. Облыстың әлеуметтік-экономикалық көрсеткіштері көп жағдайда осындай кәсіпорындардың қызметіне байланысты, сондықтан да біз сіздердің тұрақты жұмыс істеулеріңізге мүдделіміз. Жалпы алғанда 2016 жылдың қорытындысы бойынша компания кейбір төмендеулерге қарамастан, алға қойылған міндеттерді орындады», - деді Бердібек Сапарбаев.
«Ақтөбе мыс компаниясы» ЖШС бас директоры Александр Сизиков 2016 жылғы кәсіпорынның өндірістік қызметінің қорытындылары, сондай-ақ ұжымдық келісім-шарттың орындалуы туралы айтып берді, деп хабарлады Облыс әкімінің баспасөз қызметі.
2016 жылы мыс кенін өндіру мен мыс концентраты өндірісінің төмендеуіне қарамастан, компанияның ұжымдық келісім-шарт талаптарын орындағаны атап көрсетілді. Негізінен еңбекақы төлеу мерзімі бұзылған жоқ, ал орташа жалақы «Ақтөбе мыс компаниясы» ЖШС-да 3,4%-ға, «Коппер Технолоджи» ЖШС-да 3,7%-ға ұлғайған. Жұмысшыларға әлеуметтік төлемге қатысты да ілгерілеулер бар.
Өңір басшысы кәсіпорын басшылығының назарын еңбекақыны 10%-дан кем емес деңгейде ұлғайту, тауарларды сатып алуда қазақстандық құрамды молайтуға, шағын-орта бизнесті дамыту бойынша Әріптестік бағдарламаны неғұрлым тиімді жүзеге асыруға аударды.
Бердібек Сапарбаев соңғы бес жыл ішінде мемлекеттік-жекеменшік серіктестік аясында қандай да бір жобаның жүзеге аспағанын атап көрсетті. Бұл мәселені талқылау барысында «Ақтөбе мыс компаниясы» ЖШС бизнестің әлеуметтік жауапкершілігі аясында Хромтау қаласында заманауи спорт кешенін және Ақтөбе қаласында балалар бақшасын салып беретін болып келісімге келді.
Кеңес қорытындысында Мемлекет басшысының Жолдауында белгіленген басымдықтарды ескере отырып, облыс әкімі кәсіпорынның тұрақты қызметін қамтамасыз ету, инновацияны енгізу, жоғары білікті мамандарды даярлау, қазақстандық құрамды молайту, тағы басқа мәселелер жөнінен шаралар қабылдауды тапсырды.
Жиын облыс әкімдігі, кәсіпорын басшылығы және аумақтық кәсіподақ бірлестігі арасында еңбек қатынастарын реттеу және жұмысшылар үшін әлеуметтік кепілдіктерді қамтамасыз ету мәселелерінде өңірлік деңгейде алдағы уақыттағы келісілген іс-әрекеттер мен өзара түсіністік туралы меморандумға қол қойылумен аяқталды.
