Чехия ЭКСПО-2017 көрмесінде озық технологияларын ұсынбақ

7 Ақпан, 2017 20:03

Чех Республикасының Парламенті депутаттарының делегациясы ЭКСПО-2017 көрмесін ұйымдастырушының кеңсесі мен құрылыс алаңында болды.

ЭКСПО нысандарын аралағаннан кейін «Астана ЭКСПО-2017» ұлттық компаниясы басқармасының төрағасы Ахметжан Есімов пен Чехия Парламентінің Депутаттар палатасының төрағасы Ян Гамачектің кездесуі өтті.

Кездесу барысында тараптар ЭКСПО-2017 көрмесіне дайындық мәселелерін талқылады. А. Есімов қазіргі уақытта 115 ел және 18 халықаралық ұйым көрмеге қатысатынын растағанын, көрменің халықаралық қатысушыларына павильондарды беру процесі белсенді түрде жүріп жатқанын мәлімдеді.

Я. Гамачек жаңартылатын энергия көздерін пайдалануды қолдаушы ел ретінде Чехияның ЭКСПО-2017 көрмесіне қатысуының маңыздылығын атап өтті.

«Чех делегациясы өз сапарын ЭКСПО көрмесінде болуымен аяқтады, бұл Чехияның алдағы көрмеге қаншалықты көңіл бөлетінін көрсетеді. Бүгін осы көрмеге дайындық барысымен таныса отырып, оның ең жоғары деңгейде өтетініне сенімдіміз», – деді Я. Гамачек.

Палата төрағасы көрменің ашылуына Чехияның Президенті қатысатынын және елдің ең озық технологиялары таныстырылатынын мәлімдеді.

Кездесу соңында Парламент депутаттары биылғы жылғы 15 шілдеде көрме уақытында өтетін Чех Республикасының Ұлттық күнін өткізуге қатысатынын айтты.