ҚР СІМ 3 тілдегі дипломатиялық сөздікті таныстырды
«Сыртқы саясат тарихында алғашқы үш тілді дипломатиялық сөздік - қазақша-ағылшынша-орысша және орысша-қазақша-ағылшынша екі том болып жарыққа шығып отыр. Әзірге электрондық нұсқасы жоқ, бұл бағытта жұмыс жасап жатырмыз. Сөздіктердің әрбір томының тиражы - бес мың данадан», - деп хабарлады журналистерге берген сұхбатында ҚР Сыртқы істер вице-министрі Қайрат Сарыбай.
«Сөздіктер мемлекеттік органдар, университет кітапханалары, Қазақстанның шетелдегі ұйымдары, еліміздегі шетелдік дипломатиялық миссиялар арасында таратылады. «Халықаралық қатынас» мамандығы оқытылатын білім орындарына ерекше көңіл бөлінеді. Қазір біз тағы бір ағылшынша-қазақша-орысша сөздігін дайындауды қарастырып жатырмыз», - деп толықтырды вице-министр.
Сөздіктер 2004 және 2006 жылдары жарық көрген қазақша-орысша және орысша-қазақша дипломатиялық сөздік-анықтамалықтардың негізінде құрастырылған. Жаңа сөздіктер қазақ тіліндегі дипломатиялық терминдер тобын одан әрі жүйелендіруді, сондай-ақ шет мемлекеттердің, олардың басты қалаларының және негізгі халықаралық ұйымдардың атауларын дұрыс жазу нормаларын қалыптастыруды көздейді.
