• Басты
  • МЖӘ: 125 ақмолалық бала жаңа балабақшаға баратын болады (ФОТО)

МЖӘ: 125 ақмолалық бала жаңа балабақшаға баратын болады (ФОТО)

1 Ақпан, 2017 19:14
Ақмола облысының Бурабай ауданында МЖӘ аясында 125 орынға арналған жаңа балабақша ашылды, деп хабарлады облыстық әкімдік.

Жоба МЖӘ аясында іске асырылған. 125 орынға арналған осы мектепке дейінгі мекеме үшін кәсіпкерлер ескі ғимаратты жөндеп берген.

Ақпарат бойынша, жобаны іске асыру үшін 70 млн теңге жұмсалған, мемлекеттік қолдау көрсетілген, «Даму» қоры арқылы 60 млн теңге сомасына несиелік мөлшерлеме субсидияланған.

Ғимаратта жылу, сумен жабдықтау, кәріз сыртқы және ішкі жүйелеріне, электрмен жабдықтау желілеріне күрделі жөндеу жүргізілген, шатыры мен қасбеті жылытылған, 4 кіреберіс орын жөнделіп, тағы басқа да жұмыстар жүргізілген. Балабақшада толық күнге төрт топ құрылған.

Еске сала кетейік, Мемлекет басшысы Нұрсұлтан Назарбаев өзінің «Қазақстанның үшінші жаңғыруы: жаһандық бәсекеге қабілеттілік» атты Қазақстан халқына Жолдауында мемлекеттік-жеке меншік әріптестікті кеңейту кәсіпкерлікті дамыту үшін үлкен әлеует беретінін атап өткен болатын. МЖӘ-нің дамуы әкімдердің нақты әрі кәсіптік жұмысына байланысты. МЖӘ инфрақұрылымды дамытудың негізгі тетігіне айналуы тиіс.  

«Жекеменшік капитал тарту үшін мемлекет-жеке меншік әріптестігінің ықтимал барлық түрі мен нысанын пайдалану қажет. Олар – мемлекеттік мүлікті сенімді басқару, қызмет көрсету келісімшарттары, тағы басқалар. Бұл ретте келісімнің барлық рәсімдерін, әсіресе шағын жобаларға қатысты рәсімдерді мейлінше жеңілдету және жеделдету қажет», - делінген Жолдау мәтінінде.

Барлық жаңалықтар