Моноқалаларды дамыту аясында Жаңатаста 6 үй жөнделген

«Бүгінгі күні моноқалаларды дамыту бағдарламасы өңірлерді дамытудың бірыңғай бағдарламасының бір бөлігі болып табылады. Жамбыл облысының өндіруші өнеркәсіп басым дамыған моноқалаларының бірі – Жаңатас қаласы», - делінген хабарламада.

Соңғы 2 жыл ішінде Жаңатас қаласында 6 көп қабатты үй жөнделген, кезекте тұрғандарға пәтерлер берілген. Биылғы жылы 2 көп қабатты үйді жөндеуден өткізу жоспарланып отыр.

Моноқаланың құрылыс, сәулет және қала құрылысы бөлімінің басшылығы 70 пәтерлі үйге – 200 млн теңгеге жуық қаражат, ал 120 пәтерлі үйге 330 млн теңгеге жуық қаражат жұмсалғанын атап өтті.

«Егер үйді қайта салатын болсақ, бір үйдің құрылысына 1 млрд 400 млн теңгеге жуық қаражат жұмсалар еді», - деп атап өтілді әкімдікте.

Бұдан бөлек, Сарысу ауданында кәсіпкерлік қарқынды түрде дамып келеді. «БЖК-2020» бағдарламасы аясында үш жыл ішінде 19 инвестициялық жоба іске асырылған.

«ЕвроХим» ірі халықаралық минералдық-химиялық компаниясы өз жұмысын сәтті бастады. 2020 жылға дейін 2 мыңға жуық жаңа жұмыс орнын ашу жоспарлануда.