Қазақстанда Орталық Азия өңірлік гляциологиялық орталығы құрылмақ
«Келісімге 2012 жылы Астана қаласында ЮНЕСКО бас директорының ҚР-ға ресми сапары барысында қол қойылды. 17 мемлекеттің ішінен Қазақстанды таңдау ЮНЕСКО-ның Қазақстанның гляциология саласындағы жетістіктерін мойындауы болып табылады», - деп хабарлады ҚР білім және ғылым министрі Ерлан Сағадиев заң жобасын таныстыра отырып.
Оның айтуы бойынша, Қазақстанның ғалымдары 60 жыл бойы осы салада зерттеулер жүргізуде.
«Орталықтың құрылуы су қауіпсіздігі, сондай-ақ климаттың өзгеруі проблемалары бойынша жүргізіліп жатқан зерттеулердің деңгейін көтеруге мүмкіндік береді. География институтынан орталықта жұмыс істеу үшін алдын ала 43 маман іріктелген, олардың 52,4%-ы жас мамандар. Орталықтың құрылу кезеңінде қызметтік үй-жай, жабдық, бағдарламалық қамтамасыз ету және техникалық құралдарды география институты бөледі», - деп мәлімдеді министр.
Ол бұл орталықтың Орталық Азия елдері ғалымдарының зерттеу бойынша күштерін біріктіруге және үйлестіруге арналғанын атап өтті.
«Қазіргі уақытта ҚР БҒМ гляциологиялық орталық құру үшін қажетті барлық іс-шаралар кешенін орындады. ҚР Үкіметінің келісіміне сәйкес, орталықты қаржыландыру үшін қажетті қаражат бөлінген. Қазақстан үшін осы орталықтың құрылуы өте маңызды. 2016 жылы 95 млн теңге бөлінген», - деді Е. Сағадиев.
Министр мұндай орталықтың әлемде алғаш рет құрылып жатқанын қосты.
«Мұндай орталық әлемде алғаш рет құрылуда. Құрамы әр 5 жыл сайын өзгеріп отыратын басқарушылар кеңесін құру жоспарланып отыр. Орталықтың басқарушылар кеңесінің құрамына ЮНЕСКО екі өкілін және ҚР-дан 5 өкілді қосу жоспарлануда», - деп қорытты БҒМ басшысы.
Атап өтейік, Орталық Азия өңірлік гляциология орталығы (2-санат) ғылыми-зерттеу қызметін үйлестіруді нығайту жөніндегі функциялар мен міндеттерді орындайды, ғылыми зерттеулерді жүзеге асырады, өңірлік ғылыми-зерттеу бағдарламаларының әзірлемелерін көтермелейді.
Қайрат Жандыбаев
