Ескелді ауданының ШОБ субъектілері 1,9 млрд теңгенің өнімін өндірді

17 Қаңтар, 2017 19:24

Ескелді ауданында өнеркәсіпте өндірілген жалпы өнімнің көлемі 1,9 млрд. теңгені құрап, 2015 жылмен салыстырғанда 71,6 млн. теңгеге артқан. Бұл туралы Ескелді ауданының әкімі Жұбаныш Ноғайбеков Жетісу ауылының Мәдениет үйінде өткен тұрғындар алдындағы есеп беру жиынында айтты.

Ол айтқандай, бюджетке түскен салық көлемі 518,5 млн. теңгені құрап, жалпы жергілікті бюджетке түскен салық түсімдеріне шаққанда үлес салмағы 57,4 пайызды құрап отыр.

Кездесу барысында жасалған баяндамаға сүйенсек, 2016 жылдың 1 желтоқсанына ауданда 2491 шағын және орта кәсіпкерлік субъектілері қызмет көрсетіп, былтырғы жылдың сәйкес кезеңімен салыстырғанда 107 бірлікке көбейіп, 104,5 пайызды құраған.

Оның 257-сі - сауда объектілері, 2-еуі - сауда базары, 113-і - қызмет көрсету объектілері және 25-і - қоғамдық тамақтану орны. 25 белсенді кәсіпорын жұмыс істеп, әктас, құм және қиыршық тас, кірпіш, жиhаз, ауыл шаруашылығы өнімдері мен нан, кондитерлік, макарон өнімдері, жартылай фабрикаттар, шырын, джем т.б. азық-түлік тауарларын өндіруде.

Сонымен қатар есепті кезеңде ауданда шағын бизнес саласында жалпы сомасы 175,5 млн. теңгені құрайтын 7 жаңа нысан іске қосылып, 47 жаңа жұмыс орыны ашылған. Ал «Бизнестің жол картасы 2020» бағдарламасы аясында 8 жобаға жалпы сомасы 144,5 млн. теңге көлемінде мемлекеттік қолдаулар көрсетілді.

Сондай-ақ Кәсіпкерлер палатасымен бірлесіп, Ауыл шаруашылығын қаржылай қолдау қоры арқылы ауыл халқын қолдауға 10 субъектіге 49 млн. теңге несие берілді. Қосымша 46 млн. теңгеге 11 жоба мақұлданған.

Барлық жаңалықтар