EXPO 2020 Dubai ұйымдастырушылары Астанада ЭКСПО-2017 көрмесіне дайындық тәжірибесін зерттейді

16 Қаңтар, 2017 19:47

Біріккен Араб Әмірліктерінің астанасында Абу-Даби қаласында "Астана ЭКСПО-2017" және "ЭКСПО Дубай 2020" бюросы арасындағы ынтымақтастық туралы меморандумға қол қойылды.

Құжатқа "Астана ЭКСПО-2017" ҰК" АҚ басқарма төрағасы Ахметжан Есімов және "ЭКСПО Дубай 2020" бюросының атқарушы директоры Наджиб Мохаммед Аль-Али қол қойды.

Меморандум аясында тараптар 2017 жылы Астана қаласында және 2020 жылы Дубай қаласында "ЭКСПО" көрмесіне дайындалуда өзара қолдау көрсетуге дайын. Халықаралық көрмелерді ұйымдастыру мен өткізуде тәжірибе және білім алмасу, тиімді ынтымақтастық пен үйлестіруді қамтамасыз ету мақсатында, тараптар алты адамнан тұратын бірлескен жұмыс тобын құрады, деп хабарлады ұлттық компания.

«Қазақстан көрмеге жақсы дайындалып жатыр. Сіздің көрмеңіздің сәтті өтетініне сенімдімін. Біздің ұйымымыз "Астана Эксподан" білім алуға мүдделі», - деді Наджиб Мохаммед Аль-Али.

"Астана ЭКСПО-2017" ұлттық компаниясының басшысы Ахметжан Есімов "меморандумға қол қою өзара пайдалы ынтымақтастық жасау үшін тұғырнама жасауға мүмкіндік беретінін" айтты.

Барлық жаңалықтар