Астанада «Әбу-Даби Плазаның» 3 ғимараты жыл соңына дейін пайдалануға беріледі
16 Қаңтар, 2017 11:19
ҚР Премьер-Министрінің бірінші орынбасары Асқар Мамин мен Астана әкімі Әсет Исекешев «Әбу-Даби Плаза» көпфункционалдық кешенінің құрылыс барысымен танысты. Нысанды аралау кезінде құрылысшылар орындалып жатқан жұмыстардың деңгейі туралы баяндап берді.
Қала әкімдігінің ресми сайты хабарлағандай, бірнеше нысанның аяқталу мерзімдері туралы айтылды. Нақты айтқанда, «ЭКСПО-2017» халықаралық көрмесіне қарсы он төрт қабатты қонақ үй кешені және сауда орталығы тапсырылады. Ал жыл соңына дейін тағы 3 ғимарат пайдалануға беріледі.
Еске салсақ, «Әбу-Даби Плаза» кешені түрлі мақсаттағы блоктардан тұрады, олардың барлығы бірге көпфункционалдық биік ғимаратты құрайды. Атап айтқанда, онда кеңселер, қонақ үй, тұрғын үй кешені бар. Құрылыстың жалпы ауданы - 500 мың шаршы метрге жуық. Нысанда жұмыс істеп жатқан адам саны – 5000, соның 3347-сі – жергілікті мамандар.
