Оралда жаңа мектеп ашылды
12 Желтоқсан, 2013 10:45
Оралда Тәуелсіздік Күні қарсаңында «Жаңа Орда» шағын ауданында нөмір 46-шы мектептің салтанатты ашылуы өтті, деп хабарлайды Батыс Қазақстан облысы әкімдігінің баспасөз қызметі.
«46-орта мектебінің құрылысы биылғы жылдың наурыз айында басталды. Аталмыш нысанның құрылысына республикалық және жергілікті бюджеттен 725 млн теңге бөлінді», - делінген хабарламада.
Мектептің жалпы ауданы 5831,5 шаршы метрді құрайды. Мұнда 672 оқушы білім алады деп күтілуде.
Хабарламада айтылғандай, жаңа мектеп заманауи талаптарға сай келеді. Керекті құрылғылар мен жиһаздармен қамтылған. Асханасы 160 адамға есептелген ғимараттың кітапханасы 25 адамдық. Акт залының сиымдылығы 180 адам. Сонымен қатар, 2 информатика кабинеті, 2 ағылшын тілі кабинеті мультимедия мен 3 шеберхана бар.
