Жамбыл облысының ЖЭК нысандары ЭКСПО-2017 көрмесінде көрсетуге даярлануда

2009 жылы Қазақстанда «ЖЭК қолдау туралы» заңының қабылдануымен жамбыл өңірінде қуаттылығы 7 МВт-дан 300 МВт дейінгі гидро-, жел және күн электр станцияларының құрылысы бойынша оннан астам инвестициялық жоба іске асырылған және іске асыруға жоспарланған.

2012 жылы Қордай ауданында Қазақстандағы және Орта Азиядағы алғашқы күн электр станциясы пайдалануға берілген.

Сондай-ақ ЖЭК нысандарының арасында Қазақстандағы алғашқы Қордай асуындағы өнеркәсіптік ЖЭС, Тасөткел су қоймасындағы ірі шағын ГЭС, Меркен ГЭС-і, Қарақыстақ ГЭС-і және басқалары бар. 2015 жылы құны 23,2 млрд теңгені құрайтын, Қазақстандағы ең ірі КЭС пайдалануға берілген, онда 192 мың күн панелі орнатылған және қазіргі уақытта ол жылына 50 мегаватт өндіреді.  

ЭКСПО-2017 халықаралық көрмесінде жамбылдық 9 ЖЭК жобасымен таныстыру жоспарланып отыр.

Бұдан бөлек, өңір әкімдігінде 2020 жылға дейін облыста жалпы қуаттылығы 841 МВт және құны 278 млрд теңгені құрайтын жаңартылатын энергия көздері саласындағы бірқатар жобаларды іске асыру жоспарланып отырғаны туралы хабарланды.

Жамбыл облысының әкімдігі осы жобаларды іске асыру үшін Франция, Германия, Түркия, Ресей және Қытайдан инвесторларды тартуға ниетті.