ОҚО-да 2 дәрігерлік амбулатория пайдалануға берілді (ФОТО)

«Халыққа сапалы медициналық қызмет көрсету – біздің басты міндетіміздің бірі. Толығымен заманауи медициналық құралдармен жабдықталған мекеме соның айғағы. Алдағы уақытта ауданда халық саны көп шоғырланған 2 елдімекенде емхана құрылысы басталады. 13 ауылда фельдшерлік-акушерлік пунктін салу жоспарда бар. Мұның барлығы да ел игілігі үшін жасалады», –  деді облыс әкімі Жансейіт Қансейітұлы.

Тәулігіне 25 науқасты  қабылдауға қабілетті дәрігерлік амбулаторияда 18 адам тұрақты жұмыспен қамтылған. Облыстық бюджет есебінен салынған нысанның жалпы құны – 158 млн 129 мың теңге. Құрылыс жұмыстарын «Арнур строй» мекемесі жүргізіп, мерзімінде пайдалануға берді. 

Бүгінде Келтемашат ауылдық округіне қарасты 5 елді мекенде 4997 халық тұрса, Кершетас ауылында 1773 тұрғын бар. Ауданда өткен жылы 3 медициналық нысанның  құрылысы жүріп, 3 нысан күрделі жөндеуден өткен. Айта кетейік, соңғы 25 жылда Түлкібас ауданында 24 денсаулық сақтау ғимараттары бой көтеріп, 32-сі күрделі жөндеуден өтті.

Осы күні Арыс ауылдық округі, Керейт ауылында дәл осындай дәрігерлік амбулатория ел игілігіне берілді. Жалпы Арыс ауылдық округінде 3452 халық тұрса, оның 1812-сі Керейт  тұрғыны.

Сонымен қатар өңір басшысы Т.Рысқұлов ауылында бой көтерген 5 қабатты 2 тұрғын үйдің ашылу салтанатына қатысып, тұрғындарға жаңа пәтер кілттерін табыс етті. 

Былтыр іргетасы қаланған  64  пәтерлі тұрғын үйдің  жалпы сметалық құны – 457 млн. 180 мың теңге. Құрылыс жұмыстарын "Тамерлан корпорешн" ЖШС-і жүргізген.   Ал, "Шұғыла 2002" ЖШС-і тұрғызған 32 пәтерлі екінші тұрғын үйдің құрылысына 227 млн. 921 мың теңге жұмсалған.   

Бүгінге дейін Түлкібас ауданында 100 пәтерлі тұрғын үй ел игілігіне берілген.  Алдағы уақытта ауданда 256 пәтер 5 ұрғын үйдің құрылысын жүргізу жоспарланып отыр.