ЖҚЖК: 2016 жылы 18 мың қарағандылық жұмыспен қамтылған

2016 жыл ішінде Қарағанды қаласының Халықты жұмыспен қамту орталығына жұмысқа орналасу мәселесі бойынша 22 223 адам жүгінген, оның ішінде 18 168 адам тұрақты және уақытша жұмыс орындарына орналастырылған, бұл өтініш білдірген азаматтар санының 81,8%-ын құрайды.

Жұмыспен қамтылғандардың арасында басым көпшілігі жұмыссыз азаматтар – 11 716 адам, бұдан бөлек, өзін-өзі жұмыспен қамтыған – 3 998 адам, жастар – 7 060 адам, әйелдер – 9 122 адам, мүгедектер - 223 адам, босатылған жұмыскерлер - 369 адам, аз қамтамасыз етілгендер – 23 адам.

Кәсіпкерлік бастаманы ынталандыру арқылы жұмыспен қамтуды қамтамасыз етуді көздейтін «Жұмыспен қамтудың жол картасы 2020» бағдарламасының екінші бағыты бойынша бағдарламаның 10 қатысушысына 29 млн теңге сомасына шағын несиелер берілген.

Өткен жылы кәсіптік оқуға 599 адам жіберілген. Жасалған шарттарға сәйкес қаланың 88 ұйымы мен кәсіпорнында 395 жас маман «Жастар практикасына» орналастырылған.

Бекітілген тізбеге сәйкес қаланың 30 кәсіпорны мен ұйымына жұмыссыз азаматтар арасынан 449 адам қоғамдық жұмыстарға жіберілген.

Бұдан бөлек, әкімдікте атап өткендей, жұмыссыз азаматтардың ықтимал жұмыс берушілермен тікелей байланыс орнатуы, Қарағанды қаласындағы жұмыссыздық деңгейін төмендету мақсатында 2016 жылдың басынан бері 4 бос қызмет орындары жәрмеңкесі өткізілген. Жәрмеңкелерге қаланың 195 кәсіпорны және 2498 астам адам қатысқан, олардың 736-сы жұмыспен қамтылған.