Біз Сочидегі Олимпиадада спорттың 10 түрі бойынша 40 лицензияны ұтып алу мақсатын алға қойдық – Т. Есентаев
«Бүгінгі таңда 33 спортшы спорттың 7 түрінен Олимпиада ойындарына қатысу құқына ие болды. Алайда, олар Олимпиадаға дейін Әлем Кубогының барлық шараларына қатысулары тиіс», - деді Т. Есентаев.
«Лицензиялық кезеңнің аяқталуына дейін 10 спорт түрінен 40 лицензия алуды жоспарлап отырмыз.Еліміздің олимпиадалық құрамасын жасақтау ісі келесі жылдың қаңтар айына дейін жалғасатын болады» , деді ол.
Ел құрамасын жасақтау кезінде спортшыларымыздың дене дайындығы мен психологиялық жағдайына, сондай-ақ іріктеу кезеңдерінің және допингке қарсы бақылаудың қорытындылары ескеріледі», - деді Агенттік басшысы өз сөзінде.
«Қысқы спорт түрлері бойынша ұлттық құрама командаларының алдына Ванкувердегі Олимпиада ойындарындағы көрсеткіштерді жақсартып, жоғары нәтижеге қол жеткізу міндеті қойылған», - деді агенттік басшысы.
« Біздің жоспарлап отырған көрсеткіштеріміз жалпыкомандалық есепте 20-23-ші орындар үшін күресуге мүмкіндік береді, Ванкуверде біздің команда 25-ші орынға табан тіреген болатын», деп түйіндеді өз сөзін Т.Есентаев.
