Ақтөбе облысында 300 орындық аурухана ашылды

11 Желтоқсан, 2013 12:21

Ақтөбе облысына жұмыс сапарымен барған Денсаулық сақтау министрі Салидат Қайырбекова облыстық аурухананың салтанатты ашылу рәсіміне қатысты, деп облыстың ішкі саясат басқармасы хабарлады.

««100 аурухана құрылысы» бағдарламасы шеңберінде салынған Ақтөбе облыстық 300 керуеттік ауруханасы пайдалануға берілді», - делінген хабарламада.

Аурухана өз ара байланысқан 4 блоктан тұрады. Ғимараттың жалпы көлемі – 65 мың ш.м. Жоба бағасы – 11,8 млд. теңге.

Жаңа көп салалы стационар облыстың ересек тұрғындарына әртүрлі аурулар және ауытқуларға қарсы кешенді түрде жоғары сапалы медициналық көмек көрсетеді.

Аурухана құрамында 20-дан астам емдеу-диагностикалық бөлімшелер бар. Оларда емделушілер терапевтік, кардиологиялық, кардиохирургиялық, хирургиялық, травматологиялық және нефрология салалалары бойынша ем ала алады.

Стационар кең көлемде хирургиялық көмек көрсетуге арналған. Онда эндовидеохирургия қолданыла отырып, аз инвазивті операциялар жасалатын, операциядан кейінгі кезеңді қысқартуға мүмкіндік беретін тамыр хирургиясы, нейрохирургия бөлімшелері бар.

Ауруханада Еуропа елдерінде, Ресейде, Оңтүстік Кореяда біліктілігін жетілдірген жоғары санаттағы медициналық және ғылыми қызметкерлер жұмыс жасайтын болады.

Барлық жаңалықтар