Берлинде Қазақстан Республикасының Тәуелсіздік Күніне орай салтанатты қабылдау өтті

11 Желтоқсан, 2013 10:45

Ағымдағы жылдың 10 желтоқсаны күні Берлиндегі «Axica» конгресс-холлында Қазақстанның Германиядағы Елшілігі Қазақстан Республикасының Тәуелсіздік күніне арналған салтанатты қабылдау және мерекелік концерт ұйымдастырды.

«Қазақстандықтарды ұлттық мейраммен құттықтауға 1000-нан аса қонақ, оның ішінде: ГФР-дың көрнекті қоғамдық және саяси қайраткерлері, Бундестаг, ландтаг депутаттары, министріліктер мен ведомстволардың басшылары, мәдениет қайраткерлері, дипломатиялық корпус, БАҚ, қазақ диаспорасы, студенттік жастар, сонымен қатар Германияның іскер топтары өкілдері келді. ГФР Сыртқы істер министрі Г.Вестервелленің аталған іс-шараға қатысуы айырықша оқиға болып табылды. Бұл ынтымақтастықтың жоғары деңгейін және Германияның Қазақстанға ерекше ықыласын көрсетеді», - делінген хабарламада.

ҚР ГФР-дағы Елшісі Нұрлан Онжанов өз сөзінде Қазақстан Президенті Нұрсұлтан Назарбаевтың басшылығымен елімізде атқарылып жатқан негізгі жетістіктер мен табыстарға тоқталды. Қазақстандық дипломат Германия өкілдеріне 2012 жылдың ақпанында Мемлекет басшысы мен Федералдық канцлер Ангела Меркель арасындағы келіссөздер барысында қол жеткізілген келісімдерді орындау бағытындағы жемісті және өзара тиімді ынтымақтастық халықаралық ұжымдары аясында біздің елдердің табысты жетістіктері үшін алғыс білдірді.

Мемлекеттер арасындағы сауда-экономикалық дамуға оң баға берілді. 2013 жылдың 3 тоқсанында өзара сауда айналымының көлемі 14,7 пайызға өсіп, 4,7 млрд. евродан асты.

Кеш барысында германдық әріптестер Қазақстан Республикасы мен Германия Федеративтік Республикасы арасындағы саяси және экономикалық ынтымақтастығының жоғары потенциалын атап өтіп, Қазақстан халқына алдағы уақытта тұрақтылық және өркендеу тіледі. Жиналған қонақтар біздің еліміздің халықаралық аренада беделінің, Қазақстанның әлеуметтік-экономикалық дамуының қарқынды артып келе жатқанын, сонымен қатар «G-Global» және «АТОМ» секілді Қазақстан ұсынған ірі сыртқы саяси бастамалардың өзектілігін және практикалық бағытын атап өтті.

Қазақстан мәдени кеші Е.Құсайыновтың басшылығымен фольклорлық ансамбльдегі қазақ халық аспаптарының асқан шеберлікпен орындалуымен ерекшеленді. Неміс көрермендері шаңқобыз, сыбызғы, саз-сырнай, қауырсын-сырнай, жетіген, домбыра тағы басқа ұлттық аспаптардың орындауындағы академиялық, осы заманғы және халық музыкаларының үндескен үнінен рахат алды. Қамыстан, сүйектен және қаз қауырсынынан жасалған еш нәрсемен салыстыруға келмейтін бірегей туынды-қазақ аспаптарының тембрі қазақстандық әншілерінің өлең айтуымен үйлесім тапты.

Неміс аудиториясы қызу қол шапалақтаумен алыс Германияда біздің еліміздің рухани мәдениетін тағы бір мәрте қайта жаңғыртқан Қазақстанның қайталанбас таланттарына өзінің қошеметін көрсетті.

Казақтың қонақжайлық дәстүрі бойынша ұлттық бай дастархан жайылып, қонақтар ұлттық негізде дайындалған тамақтардан дәм татуға мүмкіндік алды.