Н.Назарбаев Түрік Республикасының Қорғаныс министрімен кездесті
10 Желтоқсан, 2013 18:10
ҚР Президенті Нұрсұлтан Назарбаев Түрік Республикасының Қорғаныс министрі Исмет Йылмазбен кездесті, деп хабарлайды Ақорданың баспасөз қызметі.
Кездесуде әскери-техникалық саладағы екіжақты ынтымақтастық мәселелері талқыланды. Атап айтқанда, таяуда ашылған электронды-оптикалық құрылғылар шығаратын қазақ-түрік бірлескен кәсіпорны аясындағы серіктестік перспективалары қаралды.
Мемлекет басшысы екі елдің қорғаныс өнеркәсібіндегі өзара ықпалдастығын одан әрі дамыту үшін бұл кәсіпорынның мән-маңызын атап өтті. Нұрсұлтан Назарбаев зауытты білікті жергілікті кадрлармен қамтамасыз етудің маңыздылығына да назар аударды.
Өз кезегінде И.Йылмаз кәсіпорын құрылысы әскери-техникалық саладағы екіжақты қарқынды ынтымақтастықтың нәтижесі екенін айтты. Бұған қоса, ол бұл салада жақсы перспектива барын атап өтіп, серіктестіктің одан әрі дами түсетініне сенімін білдірді.
