Қ. Тоқаев пен Германия және Франция елшілері ынтымақтастық жағдайын талқылады
10 Желтоқсан, 2013 17:59
Қазақстан Республикасы Парламенті Сенатының Төрағасы Қасым-Жомарт Тоқаев Германия Елшісі Гидо Херцті және Франция Елшісі Франсис Этьенді олардың өтініштері бойынша қабылдады, деп Парламент Сенатының баспасөз қызметі хабарлады.
«Кездесу барысында Қазақстан мен Германияның және Қазақстан мен Францияның қазіргі кезеңдегі және келешектегі ынтымақтастығының өзекті мәселелері, оның ішінде парламентаралық қатынастар тақырыбы қозғалды. Тараптар Қазақстан мен Еуропа Одағы арасындағы әріптестікті, БҰҰ және ЕҚЫҰ аясындағы өзара іс-қимылды дамыту жайын талқылады», - делінген хабарламада.
Сенат Төрағасы Астанада өтетін ЭКСПО-2017 халықаралық көрмесінің маңызына назар аударып, Орталық Азиядағы осынау ерекше оқиғаға ГФР мен Францияның белсенді түрде қатысуына сенім білдірді.
