Петропавлда «Нұрлы жол» бағдарламасы бойынша 210-нан астам отбасы жаңа пәтерге ие болды

12 Желтоқсан, 2016 09:59

Қазақстан Республикасы Тәуелсiздiгiнiң 25 жылдығы қарсаңында 55, 75 және 90 пәтерлi үш үй қолданысқа берiлдi. Қос мерекемен қуаныш иелерiн облыс әкiмi Ерiк Сұлтанов құттықтады, деп хабарлады облыс әкімдігі.

«Әр адам үшiн жайлы баспана тұрақтылықтың, берекенiң кепiлi. Сондықтан, елiмiзде халықты қолжетiмдi тұрғын үймен қамтамасыз ету мәселесiне ерекше көңiл бөлiнуде. Бiздiң облыста жыл сайын тұрғын үй құрылысы артып келедi. Былтыр өсiм 17%-ды құраса,биыл 20%-дан астам көрсеткiшке жетiп отыр», — дедi Ерiк Сұлтанов.

«Береке» шағын ауданындағы жаңа үйлер 2015-2019 жылдарға арналған «Нұрлы жол» инфрақұрылымды дамыту бағдарламасы бойынша «Қазақстан тұрғын үй құрылыс жинақ банкi» АҚ желiсiмен салынған. Iс-шара барысында қоныс иелерiн «Қазақстан тұрғын үй құрылыс жинақ банкi» АҚ басқарма төрағасының орынбасары Айжан Медеуова да құттықтады.

«Бiздiң өңiрде бағдарлама аясында 10 үй салынып жатыр. Оның үшеуiн бүгiн қолданысқа бердiк. Әлi 7 үй бар. Солтүстiк Қазақстан облысында бiздiң банкпен 24 мың келiсiмшарт жасалған. Сiздер бiзге 10 миллиардтан астам қаражатты сенiп тапсырдыңыздар», — дедi Айжан Медеуова.

«Қазақстан тұрғын үй құрылыс жинақ банкi» АҚ-ның жергiлiктi атқарушы орган салымшылары арасынан 220 отбасына пәтер кiлттерi табысталды.

Салтанатты шарадан соң облыс әкiмi Ерiк Сұлтанов қоныс иелерiнiң пәтерлерiн аралады.