ЖҚЖК: Биыл Астанада 60 әлеуметтік нысан жөнделеді

8 Желтоқсан, 2016 11:36

Биыл Астана қаласында «ЖҚЖК 2020» бағдарламасы шеңберінде 60 әлеуметтік нысан жөнделеді, деп хабарлады ҚР Денсаулық сақтау және әлеуметтік даму министрлігінің баспасөз қызметі.

2016 жылы Астана қаласында «Жұмыспен қамтудың 2020 жол картасы» бағдарламасының жұмыспен қамтуды инфрақұрылымды және тұрмыстық-коммуналдық шаруашылықты дамыту арқылы қарастыратын бірінші бағытын іске асыруға республикалық бюджеттен 2,9 млрд. теңге бөлінді.

Осы қаражат есебінен 60 инфрақұрылымдық нысандарда күрделі жөндеу жұмыстарын жүргізу жоспарлануда.

Жөнделетін ғимараттардың 14-і - білім беру, 20 - мәдениет, 11 - денсаулық сақтау, 5 - көлік инфрақұрылымы, 3 - дене шынықтыру, 7 - әлеуметтік қорғау нысандары.

Бүгінгі күні барлық жобалар іске асырылуда, 1099 адам жұмысқа тұрды, олардың 571-і «ЖҚЖК 2020» бағдарламасына қатысушылар.

2015 жылы «ЖҚЖК 2020» бағдарламасының бірінші бағытын іске асыруға 13,7 млрд. теңге бөлінгенін, жалпы республика бойынша 588 инфрақұрылымдық жобалар жүзеге асырылып, 8,6 мың адам жұмысқа орналастырылғанын естеріңізге саламыз. 2016 жылы «ЖҚЖК 2020» бағдарламасының бірінші бағытын іске асыруға 80,1 млрд. теңге бөлінді. Бұл қаражат жобалардың саны ескеріле отырып, жергілікті атқарушы органдардың тапсырыстары негізінде өңірлер арасында бөлінеді.

Барлық жаңалықтар