Елбасы кітапханасында «Назарбаев моделі» кітабының тұсаукесері өтті (ФОТО)

Қазақстан Республикасы Тәуелсіздігінің 25 жылдығына арналған жаңа туындының авторлары – Махмұт Қасымбеков, Бақытжан Темірболат, Тимур Шаймергенов.

Кітаптың тұсаукесер рәсіміне Қазақстан Республикасының Президенті Кеңсесі өкілдері, мемлекет және  қоғам қайраткерлері, сарапшылар, ғалымдар мен ақын-жазушылар, жоғары оқу орындарының студенттері қатысты.

«Бұл кітап – біздің жас мемлекеттің табыс кілті жайлы сыр шертеді. Авторлар дәстүрлі тарихи-хронологиялық жолды таңдамады. Кітапта нақты мысалдармен қазақстандық жолдың іргетасын қалаған және жас мемлекеттің табысты дамуына жол ашқан Елбасының басқарушылық шешімдерінің алгоритмі арнайы әзірленген инфографикалардың көмегімен көрсетіледі. Авторлар күрделі ішкі және сыртқы жағдайда дамудың даңғыл жолына түскен жас мемлекетті басқарудың нәтижелі жүйесін «Назарбаев моделі» деп атайды. Бұл қазақстандық көшбасшының саясатын мемлекеттік менеджмент теориясы мен практикасы арқылы тереңнен зерделеу болып табылады. Жаңа басылымның негізгі міндеті – «Назарбаев үлгісінің» аса маңызды негіздерін жүйелеп, басқарудың батыс мектептерінде танымал кейс әдісін пайдалану арқылы оқырман қауымның назарына ұсыну.  Оның ішінде ядролық қарудан бас тарту, «Қазақстан-2030» стратегиясын әзірлеу, Қазақстанның астанасын көшіру, көпвекторлы сыртқы саясаттың басты тәсілдерін қалыптастыру іспетті мемлекет басшылығы және оның көшбасшысы алдында тұрған күрделі басқарушылық шешімдер бар», - деп жаңа кітаптың мазмұнымен авторлардың бірі ҚР Президенті Кеңсесі бастығының орынбасары Бақытжан Темірболат таныстырды.

Жаңа көзқараспен, үлгімен, тәсілмен ерекшеленетін жаңа кітапта Қазақстанның ширек ғасырдағы мемлекеттік құрылысына басқарушылық талдау жүргізуге талпыныс жасалған.

Фото: Азамат Әлиев