С.Кулагин Степняк қаласында тұрғын үй құрылысының көлемдерін ұлғайтуды тапсырды (ФОТО)

8 Желтоқсан, 2016 09:16

Ақмола облысының әкімі Сергей Кулагин Еңбекшілдер ауданына жұмыс сапары кезінде Степняк қаласында енгізілетін тұрғын үй көлемдерін ұлғайтуды тапсырды.

Өңір әкімдігі хабарлағандай, әкім Степняк қаласындағы құны 127 млн теңгеден астам 21 пәтерлі тұрғын үйдің құрылысымен танысты. Үй 2017 жылдың екінші тоқсанында пайдалануға беріледі.

«Соңғы 25 жыл ішінде бұл алғашқы жаңа тұрғын үй. Ауданның дамуы, ең алдымен, құрылыспен байланысты болуы тиіс. Осыған орай, тағы бірнеше көппәтерлі тұрғын үйдің құрылысы үшін жобалық-сметалық құжаттама әзірлеуді тапсырамын», - деді С. Кулагин аудан басшылығына.

Сондай-ақ өңір басшысы Амангелді орта мектебін ағымдағы жөндеуден кейін қарап шығып, педагогтер ұжымымен және оқушылармен кездесті.

Әкім жергілікті әкімшілікке және мектеп басшылығына келесі жылы ғимаратта күрделі жөндеу жүргізуді тапсырды.

Жұмыс сапарының соңында өңір басшысы азаматтарды жеке сұрақтары бойынша қабылдап, аудан белсенділерімен кездесті.