Қазақстанда тұрмыстық қалдықты өңдеу инфрақұрылымын қалыптастыру ұсынылды

6 Желтоқсан, 2016 16:34

Қазақстанда тұрмыстық қалдықты өңдеу инфрақұрылымын қалыптастыру қажет, бұл туралы «Қазақстан Республикасының кейбір заңнамалық актілеріне экологиялық мәселелер бойынша өзгерістер мен толықтырулар енгізу туралы» заң жобасы бойынша жұмыс тобының кеңейтілген отырысында Мәжіліс депутаты Құралай Қаракен мәлімдеді.

«Қазақстан Республикасының кейбір заңнамалық актілеріне Қазақстан Республикасының «жасыл экономикаға» көшуі мәселелері бойынша өзгерістер мен толықтырулар енгізу туралы» Қазақстан Республикасының Заңына өзгерістер мен толықтырулар енгізу көзделген.

«Өз кезегінде Экологиялық кодекске де өзгертулер енгізілді. Заң 2016 жылдың маусымынан бастап қатты тұрмыстық қалдықтарды көмуге тыйым салды. Оған қоса, Экологиялық кодекске сәйкес 2019 жылдан бастап өңделмеген тұрмыстық қалдықтарды көмуге де тыйым салынады. Біз екі өзгертуді де 2019 жылдан бастап енгізуді ұсынып отырмыз», - деді заң жобасының бастамашыларының бірі, Мәжіліс депутаты Құралай Қаракен.

Заң жобасы қолданыстағы экологиялық заңнаманы жетілдіру және оны қолдану практикасы барысында айқындалған құқықтық олқылықтарды жою мақсатында әзірленген.

Ұсынылып отырған заң жобасы екі бағытта өзгертулер енгізуді көздейді.

Түзетулердің бір бөлігі орта және шағын бизнес үшін әкімшілік кедергілерді азайту мақсатында қоғамдық тыңдау өткізу арқылы халықтың шешім қабылдауға қатысу процесіне байланысты.Түзетулердің келесі бөлігі қалдықтарды қолдану жөніндегі мәселелерді реттеуге бағытталған.

Барлық жаңалықтар