ҚР-да 2013 жылы РФ-нан тасымалданған әскери техника ауқымы максималды деңгейге жетті – ҚМ

10 Желтоқсан, 2013 15:02

Бүгін Қазақстан Республикасының Қорғаныс министрлігінде Қорғаныс министрі Ә.Жақсыбековтің Ресей Федерациясы Үкіметі төрағасының орынбасары Д. Рогозинмен кездесуі өтті, деп ведомствоның баспасөз қызметі хабарлады.

«Кездесу барысында әскери-экономика және әскери-техника саласы бойынша екіжақты ынтымақтастық мәселелері талқыланды. Қазақстанның Ресеймен осы салалар бойынша ынтымақтастығы өзара тиімді әрі сындарлы негізде дамуда екендігі аталып өтті», - делінген хабарламада.

Кездесу барысында Қазақстанда жұмыс істеп тұрған бірлескен кәсіпорындарды дамыту, сондай-ақ болашақта бірлескен жаңа жобаларды жасау жөніндегі нақты жоспар келісілді.

Сонымен бірге Қазақстан мен Ресей ӘШҚ Бірыңғай аймақтық жүйесін құру жөніндегі Келісімді іс жүзіне асыру, сондай-ақ құрылатын жүйені техникалық қамтамасыз ету сұрақтары талқыланды.

Тараптар әскери мақсаттағы өнімдерді өзара жеткізу айтарлықтай өсіп отырғандығын атап өтті. Мәселен, ағымдағы жылы әскери техниканы жеткізу көлемі соңғы он жылда барынша өскендігі байқалды.

Жалпы келіссөздер екі елдің қорғаныс өнеркәсібінің оң дамуын және тең дәрежедегі ынтымақтастық негізінде өзара іс-қимыл жасайтынын растады.