ЖЖК: бағдарламаны іске асыру басталғаннан бері 27 мың қызылордалық жұмысқа орналастырылған

Облыс әкімдігінің деректері бойынша, 2011 жылдан бастау алған «Жұмыспен қамтудың жол картасы – 2020» бағдарламасы бойынша осы уақытқа дейін өңірде 27 мың адам тұрақты жұмыспен қамтылып, 6 мың адам кәсіптік біліктілігін арттырған. 5 мыңнан астам адам кәсіпкерлік саласында жеңілдетілген шағын несиеге қол жеткізген.

Аталған бағдарламаның жүзеге асырылуы нәтижесінде аймақтағы жұмыспен қамтылған халық саны 2,5 пайызға артып, жалдамалы жұмысшылар саны 2 пайызға, жұмыссыздық деңгейі 12 пайызға төмендеген. 

Әкімдікте атап өткендей, аталған бағдарламаның бірінші бағыты кәсіптік біліммен жастарды қамту. Қазіргі таңда өңірдегі техникалық және кәсіптік білім беру 31 колледж арқылы іске асырылуда. Оның 16-сы мемлекеттік, 15–сі жеке меншік білім ордалары. Сонымен қатар, облыста кәсіпорындар жанынан ашылған 2 оқу орталығы бар.

Қазіргі таңда 97  мамандық бойынша жастарды оқыту ұйымдастырылып, жұмысшы мамандықтарына баса назар аударылып отыр.