Қазақстандықтар кәдеге жаратуға арналған автомобильді өз бетінше бағалай алады (ФОТО)

17 Қараша, 2016 15:17

2016 жылғы 21 қарашада Қазақстанның 17 қаласында Өндірушілердің (импорттаушылар) кеңейтілген міндеттерінің операторы – (ӨКМ) ескі автомобильдерді өтеуін төлеп сатып алу жөніндегі бағдарламаны іске қосады, деп хабарлады «ӨКМ операторы» ЖШС басқарушы директоры Рустам Темірбек компанияда өткен брифинг барысында.

Бағдарламаға М1 категориясына жататын көлік құралдарының, яғни салмағы 3,5 тоннадан немесе жеті отырғызу орнынан аспайтын жеңіл автомобильдердің иелері қатыса алады. Көлік иесі көлік құралын одан әрі кәдеге жаратуға тапсырып, оның орнына ақшалай өтемақы ала алады.

Жобаны іске асыру аясында автокөлік құралын қашықтықтан бағалауды жүзеге асыруға, сондай-ақ ӨКМ операторының бас кеңсесі мен жинау пункттері арасында электрондық құжат айналым жүргізуге мүмкіндік беретін автоматтандырылған ақпараттық жүйе әзірленген.

«Кәдеге жарату төлемінің» мөлшері екі кіші категория бойынша қалыптасады: жиынтығы толық - 150 мың теңге және жүрмейтін автомобильдер, бұл ретте шанағы, есігі, қозғалтқышы бар - 48 мың теңге.

Директордың айтуы бойынша, қазіргі уақытта Қазақстанның 17 өңірінде пайдаланудан шыққан көлік құралдарын (ПШКҚ) жинау пункттерін материалдық-техникалық жарақтандыру жүргізіліп жатыр.

«Бағдарламаның іске қосылуы экологиялық емес және қауіпсіз емес көлік құралдарының санын қысқартуға бағытталған», - деді Р. Темірбек.

ҚР Энергетика министрлігі жобаны іске асыру үшін 2016 жылдың соңына дейін 10 мың автомобильді өтеуін төлеп сатып алуға квота бөлгені атап өтілді.

Ботагөз Айтжанова

Сурет Азамат Әлиев