ТМД елдерінің ТЖ жою жөніндегі келісімі табиғи апаттар тәуекелін төмендетуге мүмкіндік береді – ҚР ІІМ
«Келісімге 2015 жылғы 16 қазанда Бурабай кентінде мемлекеттер басшылары кеңесінің отырысын өткізу барысында қол қойылды. Тараптардың біреуінің күшімен, құралдарымен жойылуы мүмкін емес ТЖ-да осы келісімнің іске асырылуы келісім елдерінің біреуінің аумағында ТЖ туындаған жағдайда бірлескен үйлестірілген әрекеттердің ұйымдастырылуына ықпал етеді. Келісімді ратификациялау ТЖ мониторингілеу және болжау саласында тәжірибе алмасуға, тарап-мемлекеттердің оқу орындарында азаматтық қорғау саласындағы мамандарды оқытуға, халықты қорғау тиімділігін арттыру мақсатында тұрақты негізде бірлескен тақырыптық конференциялар, семинарлар, сабақтар, жаттығулар жүргізуге, тараптардың аумағында ТЖ жою кезінде қысқа мерзімде көмек ұсынуға мүмкіндік береді», - деді ҚР ішкі істер министрі Қалмұханбет Қасымов.
Министрдің айтуы бойынша, заң жобасы теріс әсерге әкелмейді, ал оның қабылдануы табиғи апаттар тәуекелін төмендетуге және табиғи және техногендік сипаттағы ТЖ теріс салдарын барынша азайтуға мүмкіндік береді.
Келісімге сәйкес, осы Келісімге қатысушы мемлекеттердің бірінің аумағында ТЖ туындаған кезде немесе туындау қаупі болған кезде, бұл тарап өз мүмкіндіктеріне сәйкес еріктілік негізінде көмек көрсететін басқа тарапқа немесе тараптарға көмек көрсету туралы өтініш білдіре алады.
Ботагөз Айтжанова
