БҒМ орыс мектептеріндегі бірқатар сабақтарды қазақ тілінде оқыту мәселесін қарастырады

«Жалпы, бізде оқыту тілі бойынша шешімін таппаған бір мәселе бар. Бұл өте күрделі мәселе. Тілдер қазіргі заманауи әдістемеге сай жүйелік деңгеймен оқытылады. Бізде қазақ тіліндегі деңгейлік жүйе жазылды, алайда оқулықтар шығарылмаған. Сол үшін барлық оқулықтарды қайта басуымыз керек», - деді А.Сәрінжіпов.

Министрдің айтуынша, қазіргі таңда 100 орыс мектебінде аталмыш жүйе енгізілген. Кей сабақтар қазақ тілінде оқытылуда.

Сонымен қатар, бас ұстаз қазақ мектептеріндегі орыс тілін оқыту жүйесін енгізу керектігін айтты.

Сәрінжіповтың мәліметінше, еліміздің барлық мектептерінде тілдің үш тұғырлылығын енгізу керек.

«Біз мектептерді үш тілді етуіміз керек. Және мектеп түлектері оқуды бітірген кезде үш тілді еркін меңгерулері керек. Қазақ тілін өз мәдениетін, әдебиетін білу үшін, орыс тілін байланыс құралы үшін, ал ағылшын тілін технологияны көтеру үшін игерулері керек. 10-20 жылдан кейін мектептер қазақ-орыс тілді болып бөлінбей, үш тілді болулары керек», - деді бас ұстаз.