Қала мен ауыл мектептерінің білім беру сапасында теңсіздік бар – БҒМ

«Қазіргі таңда мектептегі білім беру жүйесінде еліміздегі 7 698 күндізгі мемлекеттік мектептерінде  2,5 млн. бала оқиды. Осыған қарамастан қала мен ауыл мектептерінің білім беру сапасында теңсіздік бар. Апаттық жағдайдағы мектептердің 93%-ы мен спорт залы жоқ мектептердің 80%-ы ауылдық жерлерде орналасқан», - деді еліміздің Бас ұстазы.

Сонымен қатар, ауылдық жерлердегі жоғары деңгейдегі ұстаздардың үлесі 11,5%-ды құрайды. Бұл қаладағы көрсеткіштен екі есеге аз. Алайда еліміздегі мектептердің 75 пайызы ауылдық жерлерде орналасқан.

«Аталмыш мәселені шешу үшін министрлік тарапынан келесі мәселелер қабылданды. Апаттық және үш ауысымды мектептердің құрылысына қажеттіліктердің картасы дайындалды. 2014 жылдан бастап республикалық бюджеттен 50 мектепті салу жоспарланған. Сонымен қатар, өңірлердегі инфрақұрылымдық мәселелерді шешу қарастырылған. Бар-жоғы 3 жылдың ішінде 146 мектеп салынып, 2016 жылға қарай апаттық жағдайдағы мектептер саны 2 есеге азаяды. Бұларға қосымша ауылдық мектептерде жаңадан түрленген сыныптар ашылады»», - деді Аслан Сәрінжіпов.

Оның айтуынша, Қазақстанда мектептердің кадрлық әлеуетін арттыру көзделген, соның ішінді бірінші кезекте ауылдық мектептер қарастырылған.