Сауд Арабиясы Ана мен бала орталығына 3,5 млн доллардың қондырғысын тарту етеді
9 Қараша, 2016 12:37
Сауд Арабиясы Астанадағы Ана мен бала орталығына 3,5 млн доллардың қондырғысын тарту етеді, деді ҚР-ның Сауд Арабиясындағы және Бахрейн Корольдігіндегі Өкілетті және Төтенше елшісі Батыр Батыршаев Сыртқы істер министрлігінде.
«Корольдіктің Астанадағы қайтарымсыз қаржылық көмек көрсету есебінде ҚР Парламент Сенатының мекемесі – 12 млн долларға, Осакаровка – Вишневка тас жолы – 12 млн долларға, Семейдегі балалардың туберкулезге қарсы диспансері – 7 млн долларға салынып, Б.Момышұлы атындағы Кадет корпусына 1 млн доллардың көмегі көрсетілді. Қазіргі таңда Астанадағы «Ана мен бала орталығы» үшін 3,5 млн доллардың қондырғысын Салман Королінің гуманитарлық көмек орталығы тарапынан жүзеге асыру қолға алынды», - деді дипломат.
Ол айтып өткендей, Сауд Арабиясының бастамасы бойынша қазіргі таңда Астанада осы елдің нышанын көрсететін ірі нысанның құрылысын бастау мәселесі қаралуда.
Ботагөз Айтжанова
