Қырғызстанда қазақ әдебиеті мен мәдениеті орталығы ашылды
ҚР Мәдениет және спорт министрлігінің ақпараты бойынша, мұнда Қазақстан Президенті Нұрсұлтан Назарбаевтың, қазақстандық жазушылар Ілияс Есенберлиннің, Әбіш Кекілбаевтың, Сұлтан Оразалиновтың, Махмұд Қасымбековтың, Бахыт Қайырбековтың кітаптары ұсынылған. 31 томнан тұратын қазақ-орыс және орыс-қазақ терминологиялық сөздігі ерекше қызығушылық туғызады. Терминологиялық сөздік ғылым мен техниканың, өндіріс пен мәдениеттің барлық салаларын қамтиды.
Орталықты ҚР Мәдениет және спорт министрлігінің, Қазақстан Республикасының Қырғыз Республикасындағы Елшілігінің қолдауымен ҚР Ұлттық академия кітапханасы (ҚР ҰАК) ашты.
«Осы іс-шараның өткізілуі бауырлас Қазақстан мен Қырғызстан халықтарының арасындағы достық пен ынтымақтастықтың өзіндік символы болып табылады», - деді Қырғыз Республикасының мәдениет, ақпарат және туризм вице-министрі Фархад Бекманбетов.
Бұдан бөлек, Орталықтың ашылуы барысында ҚР ҰАК-тың Қырғыз Республикасының Ұлттық кітапханасымен әріптестік және ынтымақтастық туралы меморандумға қол қойылды.
«Меморандумға сәйкес, біз Қазақстан Республикасының Ұлттық академия кітапханасында Қырғыз әдебиеті мен мәдениеті орталығын ашуды жоспарлап отырмыз. Орталықтың ашылуы екі бауырлас халықтың рухани жақындасуына ықпал етеді және кең жұртшылыққа әдебиет пен шығармашылық арқылы біздің елдеріміздің мәдениетін жақсы тануға мүмкіндік береді», - деп атап өтті Қырғызстанның Ұлттық кітапханасының директоры Жылдыз Бакашова.
