ЭКСПО-2017 көрмесін өткізуде 1,5 мыңға жуық әскери қызметші қоғамдық тәртіпті қамтамасыз етеді
Баспасөз концеренциясы барысында Ұлттық ұлан Бас қолбасшысының тәрбие және әлеуметтік-құқықтық жұмыстар жөніндегі орынбасары генерал-майор Мұхаметқали Сатов патрульдік-бекет қызмет нәтижесінде қала көшелеріндегі заң бұзушылықтар өткен жылдармен салыстырғанда 38,9 %-ға төмендегенін айтты.
Жедел мақсаттағы бөлімдер Ішкі істер органдарымен бірлесіп, еліміздің 19 қаласында қоғамдық тәртіпті күзетеді. Патрульдік қызметті атқаруға күн сайын 5000-нан аса әскери қызметші жұмылдырылады. «Қоғамдық тәртіп пен қауіпсіздік күзетіне қатысты міндеттерді сапалы орындау үшін, сондай-ақ алдымызда келе жатқан ЭКСПО-2017 халықаралық көрмесі қарсаңында елордамызда жедел мақсаттағы жеке құрама жасақталды. ЭКСПО халықаралық көрмесін өткізу кезеңінде жеке құрамнан қызметке түсетін әскери қызметшілер саны 1,5 мыңға жуықтайды. Ал 28-ші Дүниежүзілік қысқы Универсиаданы өткізу кезінде құқықтық тәртіпті қамтамасыз етуге жеке құрамнан 1200 әскери қызметші қатыстырылмақ», - деп мәлімдеді генерал-майор М.Сатов.
ІІМ ҚАЖК түзеу мекемелерін күзету жөніндегі әскери бөлімдер еліміздегі түзеу мекемелерін сенімді күзетіп келеді. Сонымен қатар, ҚР Жоғарғы және Әскери соттарындағы сот отырыстарын да қамтамасыз етуде.
Терроризм және экстремизммен күресте, мемлекет мүддесіне, азаматтардың денсаулықтары мен өміріне аса қауіп-қатер төндіретін заңбұзушылықтарға қарсы күресте «Бүркіт» арнайы мақсаттағы бөлімшелерінің алар орны ерекше. Тек қана ағымдағы жылдың 9 айы ішінде олар 1304 жауынгерлік қызмет міндеттерін, сонымен қатар тұрақты орналасқан жерлерінен тыс жерде 798 міндетті абыроймен орындады.
2014-2015 жж аралығында әскердің жеке құрамы 38 рет төтенше жағдайлар салдарын жоюға қатысты. Осы уақыт ішінде еліміздің 50-ден астам елдімекенінде апаттық-құтқару және жедел көмек жұмыстары жүргізілді. Үстіміздегі жылы Ұлттық ұлан ТЖ салдарын жою бойынша 12 рет жұмылдырылды.
Арнайы мақсаттағы бөлімшелердің арнайы операцияларды орындау кезіндегі ату мүмкіндіктерін арттыру мақсатында қару-жарақтың жаңа түрлері, заманауи оптикалық және электронды-оптикалық құрылғылар алынуда. Әскери қалашықтардың лаңкестікке қарсы қауіпсіздігі үшін 2017 жылы «ПЗТМ» акционерлік қоғамынан (Петропавл қ.) «Ұлан» күзеті техникалық құралдар жүйесінің мамандандырылған кешенін сатып алу жоспарланып отыр.
